Došel je šesti mesec i došle su vrućine. Vruće je mam od jutra, a najgorše je našim seljakima kaj zranja moraju ophodavati blago i iti delati f polje. Vruće je i Capaku i Berošu koji se po selima virovitičko-podravske županije voze v kovid autobusima i cepe ljude. Vele, došli budu i tu k nam. Suseda Štefanija veli da se ona ne bu cepila jer kaj, ne misli iti nikam z dvora van, osim mortik na renesanu, a čula je od muža da je on v birtiji čul da od vsega toga ništ jer se ni dost ljudi cepilo i rizik je prevelki. Picokijada bu išla, al to itak neje najvekša i najkompliciranejša manifestacija v pol Evrope pa nek im bu. Ovo leto zgledi ne bu ni Podravskih motiva, al to ni tak šteta, več skoram trideset let gledimo jene te iste glajže kaj su ovi naši umetniki namaljali i hrdamo one lepinje z vrhnjem i češnjakom. Mislila si je mortik i do Zagreba otiti da vidi kak ve to sad vse zgledi nakoj kaj su deli ovoga Tomaševića, al ni od toga ništ jer još navek delaju prugu od Križevci do Dugog Sela. Sused kaj dela v železnici već četrdeset let je rekel da to ne bu nigdar gotovo, a ne za dve lete kak se pripoveda.
Umesto da hoda nekam okolo po svetu, ostala bu tu pod svojom hruškom v svojemu dvorišču dok ne dojdu Capak i Beroš v kovid autobusu glet ko se još nije cepil. Prva suseda poprek se cepila skup s familijom, Jendraš kaj dela v dučanu se isto cepil, sin i snaha su se cepili još lani, a ona ne pak se sad več vsi nagledavaju prek plota kaj ona to misli, je ve ne mortik ona antivekerica ili kak se to več zove. I pri meši se pripoveda da se Štefanija nekak premišlja, a da ni v cirkvu v zadnje vreme preveč ne hoda. Capak je na televizoru rekel da idu prema zajednici, veli v ruralna mesta da se ljudi ne moraju iti cepiti v grat. Taj Capak Štefaniji nije baš praf još otkat si je sel na onu kištru s cepivom. Kaj bi bilo da si ona tak sedne na kutiju z picekima? Beroš joj je još gorši.
Kaj taj Beroš opče dela, osim kaj se okolo navaža z korona autobusom? Ništ bogznakaj, veli joj sin. Prati nekakve na pol gole dekle mlajše od njezine unuke na onom nekakvom instagromu i nije mu bilo praf kaj mu je ona bogica konobarica donesla kavu bez maske vani na otvorenom, a žena ima papire da masku nositi nesme pak se zdigel i otišel i još je ostal dužan kusura. Štefanija morti nije išla v školu i ne zna se potpisati, ali neje glupa. Zmisli se ona da Berošu ni smetalo kaj nisu meli maske dok je HDZ pobedil na izborima pak su obnarjali v stožeru ili dok je bil na moru pa se slikal i rukoval z onom Ninom Badrićkom od staroga Badrića kćerkom ili kad su v Zadru pustili vse one navijače v dvoranu na utakmicu pak je rekel da je to bila greška v korakima i još ih je vse otišel z autobusom cepiti ili dok su ve navijali v Zagrebu na trgu za nogometaše. Berošu je to vse v redu, a to kaj konobarica neje mela masku ili kaj se Štefanija neče cepiti, to ga furt muči. V redu mu je bilo i kaj je peneze fkral za onu nekakvu platformu kaj se prijaviš pa te zovu na cepljenje ili kaj su tam feštu napravili v bolnici i kaj narod neje mogel na pretrage jer neje nikoga nigde bilo ili kaj v Varaždinu nemaju peneze za plače, a ravnatelj je lepo otišel na godišnji. To mu je vse v redu, al ona i bogica konobarica su problem i nesu kreposne pa treba zdiči dramu. Onaj vrak Božinović je rekel da je Beroš napravil jedino kak bi jedan ministar zdravstva i trebal napraviti. Znači, da laže, da krade peneze, da se prvi ne drži tih mera kaj je vsima drugima del na nos i da prati skoram gole deklice na tome vragu instagromu. Samo nek dojde sim v tomu svomu autobusu, misli Štefanija. Bu videl kak mi tu živimo i kaj mislimo. Znam ja, taj čas se bu prifčil.
