Tekst po ovim naslovom objavil sam prije par let v svojoj knjigi ‘Ko to ne voli Podravce?’, a na ovu meni dragu nastavnicu i razrednicu sam se setil i v novoj knjigi ‘Maturanti staroga kova 10’ kakti uvod v njezin tekst ‘Zapisi o jednoj generaciji’. Njezina je generacija fakat bila jedna legendarna generacija puna ljudi koji su na svoj način zadužili našu Koprivnicu. V našoj sledečoj knjigi takaj imamo jedan prilog sečanja na Boženu, a posebno mi je drago kaj se sve to događa povodom 20. obljetnice njezinoga odlaska. Prije tjedan dana održan je znanstveni kolokvij i sjećanja na Boženu uz sudjelovanje mnogih poznatih ljudi koji su imali kaj za reči o Boženi i njezinoj ostavštini. Ja bi pak štel ispripovedati jednu moju emotivnu priču z davnih dana, z vremena dok je Božena došla delat v Koprivnicu.
‘Spasiteljica’ Božena
Bilo vam je to vu vreme dok je gimnazija bila još od prvoga do osmoga razreda. Taman nekak dok se trebalo upisati v prvi razred, mojem starom je obečan, kakti dobrom težaku, stan v Sljemenu pa se cela familija trebala pod ferjem preseliti v Sesvete. No kak se to obečanje ni ostvarilo, bil sam upisan nekaj kasneše ne sluteči da bi moglo biti problema. Onda vam dojde dan okupljanja novopečenih gimnazijalci na starom rukometnom igralištu između dve škole. Svaki je razrednik imal listu svojih budučih đaka, sve su to obavili za kratko vreme, al su na igralištu ostali samo moja mama Marica i ja. Naravno da sam počel cmizdriti, nismo ni mama ni ja znali objasniti kaj se zapraf dogodilo. Je li moguče da mene niko neče? Kak je jedna mlada nastanica več na odlasku vidla da se događa nekaj neobično došla je do nas i pitala kaj se zapraf događa? Mama je nekak objasnila tok događanja, a ta je nastavnica zapitala: A očeš ti iti k meni v razred? Naravno da sam štel, zapisala je moje ima i prezime i rekla nam kak se zove. Bila je to moja razrednica Božena. Kak mi se čini mi smo bili prvi razred kojega je Božena dobila po dolasku v Koprivnicu 1956. Tu je počela jedna druga i dosta duga priča. Doduše sledeče lepo su gimnaziju skratili na četri lete. Ja sam krenul onda v šesti razred osnovne, al se nisam rastajal od Božene.
Hrvatski mi je bil najdrakši predmet, rado sam prečital sve kaj bi nam Božena dala za lektiru, al se onda dogodilo još nekaj drugo kaj se pamti za navek. Kak je bila i član GAK-a, odlučila je napraviti i predstavu ze svojim đakima. Komad se zval Čarobne papučice v kojem su bile i dve glavne uloge. Atač je dobil onu prvu glavnu, a ja drugu glavnu ulogu. Doduše moje je uloga imala sve skupa nekolko rečenici, pojavil sam se na početku predstave, zgubil sam pajdaša Atača, pojavim se na kraju predstave, najdem pak pajdaša i predstava ima sretnoga kraja. Bilo je to pomalo i predstava v kojoj se predvidel i buduči odnos dva pajdaša. Z te sam predstave tek nedavno otkril sliku v jedno staroj Atačevoj škatuli na kojoj morete videti kak smo zgledali v drugoj polovici pedesetih let prošloga veka.
Priča nebi bila potpuna da ne spomenem još jedna jako važan događaj z tog vremena. Jednoga lepoga dana Božena nas je pokupila i krenuli smo put Starigrada do mesta okupljanja kajkavci našega kraja: do Galovićeve kleti. Okupili smo se oko posečenoga kostanjevoga panja gde nas je nafčila kak prebrojiti godove i odrediti starost drva. Naravno da nam je odrecitirala verojatno najpoznatešu Galovićevu popevku Kostanj. Letima je svaki naš susret v ovome našemu gradu bil jedan ugodan susret makar je bilo samo ono: Dobar dan i kak ste?
Vu Severovcu i na Pavelinaj
Ovaj naslov vam je zapraf podnaslov Boženine zbirke popevki z naslovom Čez mene ljudi idu. Ona je v tom našem kraju živela jedan dio svojega detinjstva i posvetila mu par popevki. Jedna popevka se zove Severovci i Severovke, a četrta kitica ovak veli:
Je, susedi moji, del moga živlenja,
z vulice naše zdavnja sem odišla,
a čovek, kak znate, čuda toga zmenja
pak ne znam kakva to bi slika zišla.
Za one kaj baš ne poznaju ovaj kvart Koprivnice, bum malo pojasnil. Pavelinska vulica vam ide od vulice Frana Galovića do pruge, a Severovec, ak gledate od severa prema jugu, vam ide od Pavelinske, presečete falačec Dolnjega banovca i najdete se v mojem dvorištu pred garažom. To vam je kraj gde je odrastala moja generacija, to vam je v Boženino vreme bil kraj ze skoro čistim poljoprivrednim stanovništvom, z puno vrti i vočnjaki, gde smo znali svaku ranu jabuku Petrovaču al i krušku citronku. Tu je živelo i nekolko legendarnih nogometaša našega Slavena. Nije ni čud kad nam je njegovo igralište bilo dnevni boravak.
Ak danas prejdete čez te vulice, nebute vidli ni kravicu ni pajceka, kojekakvi auti su pred svakom hižom a teško da bi mogel nabrojiti poznatoga čoveka z onoga vremena. Mogel bi se kladiti da morem prejti i čez Severovec i čez Pavelinsku da nebi čul: Dobar dan sused. Kak ste? Pavelinska je baš v ovo vreme veliko gradilište, a Severovec strpljivo čeka pešečnjaka.
Moj tjedni jelovnik
Petek
Juha: Krem juha od mešanih semenki
Glavno jelo: Lignje na pariški, tartar, slani krumpir
Desert: Čaša vina
Subota
Juha/Glavno jelo: Mesna pita, matovilec šalata
Desert: Vočna šalata
Nedela
Juha: Juha od goveđih kostiju z grisknedlima
Glavno jelo: Juneči šnicli vu saftu, luleki od kolkotolko testa, šalata
Desert: Šaumrole, kapučino
Pondelek
Juha/Glavno jelo: Kisela juha od želučeki
Desert: Nekakav sok
Tork
Juha: Kobasičja juha
Glavno jelo: Francuski krumpir, šalata
Desert: Jagode šlagom
Sreda
Juha/Glavno jelo: Svinjski paprikaš, njoki od krumpira
Desert: Puding od vanilije
Četrtek
Juha: Jedna Podravkina z vrečice
Glavno jelo: Krmenadli na naglo, pomfrit, kiseli vugorki
Desert: Čaša pive
