Više nema nikakvoga smisla gledeti v kalendar i odrediti gda je zadnji dan prolječa i gda počinje leto. Sve se je to jako zmešalo. Kraj prolječe nas je počastil z neverojatno žegom i onda nam za početak leta dojde prava salauka, pak potuče naše susede Zagorce, a nama v Podravini dojde baš lepa kišurina. No nikakvo čudo da nam se tak nekaj događa. Priroda je totalno zbunjena pa moremo očekivati da bu takvo celo kalendarsko leto. Kak bu sve to završilo bumo vidli, rekli su slepci.
Jedno kišno predvečerje v Draganovcu
Jedna se trojka pajdašije prošloga petka v momentu dolaska te kišurine baš našla v Mirnome dolu i čekala: bu tuča nebu tuča. Kak i navek Atač je imal jedno od svojih spasonosnih rešenja v slučaju da tuča kani padati po mojim goricama: Stari. Daj brzo plafte z kreveta da zaštitimo trsje od tuče!!! Neznam dal imate tolko mašte i zamislite kolko se trsi more zaštititi z jednom plaftom. Ja sam procenil da bi z tom plaftom jako dobro mogli zaštiti onu gredicu paradajzi koju je Đuro posadila za našu domaču upotrebu. Tuča ni došla, ploha je trajala par minut, napravila je pravoga potoka koj se sleval od zgora sve tam prema društvenom domu. Za koju minutu sve je prestalo, klet se lepo rashladila i mogli smo se posvetiti kojekakvim ‘ozbiljnim’ temama koje smo danima pripremali. Teško bi vam mogel nabrojiti sve te životno važne teme ali znate več otprilike kak je to zgledalo. Rešili smo neke koprivničke teme, malo smo razbistrili elitnu domaču i svetsku politiku, ali i vrlo važne teme našeg intimnog života. Šteta da nemam tonski zapis tih prevažnih tema jer bi to mogla biti jako dobra zabava i za širu publiku. Mislite da je to prešlo bez dobre papice? Ni govora. Doduše, več dok smo se dogovarali za taj sastanak Davor je naredil: Prosim lepo bez ikakvoga prežderavanja! Tak je i bilo. Napravil sam malo paštete od pilečih jetrici, načel sam jednu domaču kobasu, malo pisanoga špeka, malo paradajza i jedan francuz. Čist dost da se uz koj zalogaj popije kakav retki gemišt. E tu smo se proslavili. Davor je popil otprilike 0,2 deci čistoga, Atač i ja po jednoga retkoga gemišta. Kak se diskusija razmahala, Atač je v jednom momentu poludel i rekel: Vi men zafrkavate. Neču više piti! Nakon par minuta je sledilo: Kaj ja nemrem v ovoj kleti dobiti jedan gemišt? Hitil sam se v strošek, donesel sam još jednu politru koju nismo uspeli savladati. Tak se to dela v kleti dok se ovakvi mladiči hapiju jesti i piti. I znate kaj? Luda se zabava protegla od pol šejst čak do pol devet.
Ivanje v Goli
Da je v subotu bilo Ivanje to znaju svi koji imaju doma katoličkoga kalendara. Ja sam jemput zbrojil četrnajst Ivani tokom leta al me golski velečasni korigiral i veli da ih danas ima prek dvajst. To znači da skoro svaki drugi tjedan imamo jedno Ivanje. Ja sam onaj zimski ali sam v subotu ipak dobil od jedne drage pajdašice lepu čestitku. Fala joj lepa i prosim da mi se pak javi krajem leta.
Đuro i ja smo se pridružili veselim gostima mojega pajdaša Ivine v Goli več nekak oko podneva. Golčani nemaju vremena slaviti rođendane i imendane navečer jer kak dobri gospodari znaju da ih posel v ovo doba leta čeka več oko pete vure. Daklem skupila se lepa ekipa, bila je tu Iviniva uža familija, puno pajdašije i, kak je to v Goli običaj, bil je prisutan i njihov velečasni. Nemre takav skup prejti da se ne blagoslovi sve ono obilje ponuđeno gostima. Običaji su običaji. A imalo se i kaj blagosloviti. Za predjelo je gazdarica, domačica Slava, ponudila narezak dostojan svake i najbolše birtije. Več odavno nisam jel tak vtečnoga domačega špeka, vratinu i kobase. Z tim netreba nikakv sir, kiseli vugorki ili nedaj bože masline. Čovek si pokvari toga domačega okusa. Kak morete videti na sliki i glavno jelo je bilo svetek za oči i nepce. Pod jednom pekom onak lepi capasti buncel a pod drugom teleča koljenica. Dok se sve to onak lepo speče z puno povrča i gljiva, teško morete odoleti da malo i ne preterate. Da je bilo i šalate to se podrazumeva. I kaj da vam velim. To sve morate zalejati z dobrim zdenim gemištom.
No moram vam spripovedati i jednu zgodu koja se eto dogodila za vreme ovoga popodneva, a mogla se dogoditi bilo gde v sličnoj situaciji. Najme kaj. Muški dio ekipe okupljen oko veličasnoga, malo veseleši posle dobre papice i zdenoga gemišta, malo se opustili pa je v razgovoru kojput spomenut Svevišnji, a nije falelo niti drugih domačih sočnih reči. V jednom sam momentu pital veličasnoga jel ima dost materijala dok dojdu dečki na spoved, na kaj mi je odgovoril: Bu dost materijala i za celo leto! Pa ljudi smo. Kaj ne?
Za celo vreme jedan je čoveka, takaj Ivan, bil jako vredan i brinul je da niko ne ostane žeđen. Pital sam ga v jednom momentu jel zna kak se zove ta njegva uloga? Rekel je da je kakti konobar pa sam ga podsetil da je prema starim kajkavskim regulama zapraf fiškuš. Naš dobri stari Ksave Šandor Gjalski je odavno zmislil sve uloge dok se blaguje za ovakvim stolom. Fiškuš je jako važna uloga na takvim okupljanjima.
Moj tjedni jelovnik
Petek
Juha: Krem juha od gamberi
Glavno jelo: File od osliča na pariški, blitva i krumpir
Desert: Čaša vina
Subota
Juha: Bela juha
Glavno jelo: Kraljevski rezanci, šalata
Desert: Voče
Nedela
Juha: Goveđa juha z grisknedlima
Glavno jelo: Kuhana junetina, koparsos, pire
Desert: Štrukli z višnjama
Pondelek
Juha/Glavno jelo: Omlet ze šunkom, mešana šalata
Desert: Sok
Tork
Juha: Jedna Podravkina z vrečice
Glavno jelo: Krmenadli na naglo, pomfrit, zdela mešane šalate
Desert: Čaša crne pive
Sreda
Juha/Glavno jelo: Čušpajz od mahuni, faširanci
Desert: Pavlova; to su vam nekakvi puserli
Četrtek
Juha/Glavno jelo: Povrtni složenac; dodal bum malo nekakvoga mesa
Desert: Sigurno bu puserli od jučer
