Ne piše nam se dobro. Kam god pogledate vidite kak nam se groziju z visokim temperaturama i naravno da su se mam zbudili doktori, nutricionistiu, a i svi stareši iskusni ljudi kojima ni ništ novo da v srpnju bu i prek trideset stupnjeva v hladu. Pitanje je samo kak bu sve to dugo trajalo i kolko si očemo i moremo pomoči. Tu v prvom redu mislim na one koji se nebuju maknuli z Podravine i ne pomišljaju se uputiti prema Jadranu. Ja sam jedna od tih kaj več letima ne odlazim more. Kaj zbog zasičenosti z godišnjim od Sušaka pa do lipe Boke kaj zbog kojekakvih zanimacija koje imam i v našoj Koprivnici i naravno v Draganovcu.
Leto 2023. v Podravini
Od ranoga detinjstva moja ferja sam kak klinac provodil na moru i po mesec dana pri našim prijateljima posle i kumovima. Slučaj je štel da moj Blaž najde jednu dragu familiju v Kaštel Novom več tam krajem četrdesetih let prošloga veka a to prijatelstvo traje i danas.
V međuvremenu sam letima provodil i do pet meseci kak muzikant na jadranskim terasama. Za ove države sam letoval pri mojim dobrim prijateljima v Milni na Braču. Sve sam to vreme imal jako puno prilika nafčiti kak se boriti protiv žege. Primera radi bum zapisal kak je to bilo dvadesetak let v Milni. Dizal bi se v šesti vuri još za hlada, odeš do mesta, kupiš kaj treba, popiješ kavu i več si v devetoj vuri doma. Popiješ zdenoga orehovca ili travaricu, zbudiš pospance, svi skupa gablamo i lepo se popije po koje malo pivce. Sve se to događa pod gustom brajdom a z mora dolazi lagano osveženje. Kupanje? Vrlo retko ili tek tam negde iza pete vure popodne. Sad vi meni rečite: Kaj ni toga bilo dost čez sva ova leta? I preveč.
V našoj Koprivnici i okolici morete najti i hlada i kojekakvoga osveženja. Nekak mi se čini da bi najbolše osveženje moglo biti negde na Dravi. Vidim neki dan da su se ljudi čoporativno zabežali v Dravu križničkome mostu. To je osveženje. Kolko se sečam tu mam prek puta je i jedna lepa peščana plaža i ak si zemete kakvog pinkleca od doma morete za male novce provesti jedan prelepi dan kraj Drave.
Pred par let sam bil z nekim pajdašima v Legradu i videl jednu prelepu plažu na kojoj Legrađanima moreju zavideti i neke jadranske razvikane plaže. Nadam se da buju ambiciozni Legrađani znali iskoristiti tu prirodnu lepotu i napraviti nekaj za privlačenje zaljubljenika v kontinentalni turizam.
A tek naši bregi od Ludbrega do Đurđevačke Podravine? Jako me veseli dok vidim neke mlade hrabre ljude koji su investirali v stara trošna roditeljska imanja, napravili uzorni OPG i zainteresirali čak i mlajše ljude da pri njima provedu kakvih desetak dana v podravskom zelenilu ili barem ugodan vikend. Zapraf ne vidim nikakvu razliku v sadržajima i lepoti boravka negde na Jadranu ili v Podravini. Osim naravno ak niste ludi za partijanjem na Zrču ili negde na Hvaru. Čak mislim da imamo prednosti, pogotovo ak usporedite naše i njihove cene. Ovo kaj vidimo v medijima ovih dana z divljanjem cena na Jadranu fakat je šokantno. Nekak sam siguran da se tak nekaj pri nama nemre dogoditi.
Kaj bum pak ja poduzimal ovih paklenih dana? Držal se bum hlada. Z tolko let životnoga iskustva dobro znam kak se vugnuti žegi, kaj jesti i kaj popiti.
Morti vam pomogne moj dnevni raspored v ovim sledečim danima.
V jutro si dozvoljavam malo zležavanja dok radni ljudi več na velko delaju. Doduše v našoj vulici nigda nema mira a pogotovo ne zadnjih par meseci. Auti, kamioni, traktori i slična prometala ružiju nam dan i noč.
Jedan lagani fruštuk, kavica z Đurom, pa se čovek malo informira kaj je novoga događa v Lepoj Našoj i v svetu. Da me ne ubiju kojekakve vesti o ratu i svađe naše političke elite prelistam si malo žute stranice i svakak pročitam vic dana i duhovite karikature na račun te iste ‘elite’.
Onda vam je več vreme za A kaj da danas kuham? E tu sad počinje razmišljanje o laganoj hrani, o tome kaj je ono primereno našoj dobi i vanjskoj temperaturi. Glavna je stvar izbegavati dugo stajanje pri peči kaj če reči: brzo, lagano, zdravo i ak je ikak moguče jeftino. Zapraf si mislim. Bilo bi morti najbolje ovak: napraviti lagani al malo obilniji gablec, odmarti se negde v hladu a onda napraviti kasni obed, ranu večeru tam negde oko pete vure. A kaj je z tekučinom? Imam nekolko osvežavajučih rešenja. Več mesec dana imam vu frižideru flašu zdene vode. Nije bog zna kaj al za žeđ je jako dobro. Srečom kaj imamo zalihe sirupi. Trenutno smo na koprivi i bazgi. Kombinacija kefira, jogurta i kiseloga mleka je pravo rešenje za celi dan. V goricama pak imamo jedno “originalno” rešenje: musolini! Trenutno je to velki hit v Mirnom dolu 24 i za Janovu ekipu i za nas veterane. Neki sam dan kupil fasl sodavode i morem vam reči da su svi poludeli i za muslinijem i za špricerom. V petek smo se našli posle špricanja i košnje gorici i mladi i stari, dobro se oznojili i svi su navalili na kojekakve kombinacije ze sodom. Mislim da bumo v tom tonu nastavili još neko vreme, barem do kraja srpnja.
Kaj ja nameravam deti na jelovnik v sledečih sedam dana?
Juhe: Kuhati il ne kuhati pitanje je sad? Morti skuhati više v nedelu pa ju rasporediti za par dana i samo ju na friško zakuhati. Ima i ona zdena juha tarator koje je spas za ove dane a morete ju napraviti zapet minuta. I juha z vrečice more biti rešenje.
Hladna jela: Razni namazi su časkom gotovi a morete ih kombinirati ze kojekakvim povrčem. Recimo namaz od sira, graha čvarki ili semenki od tikve, paštete od sardine ili tune. Sve se to more kombinirati z putrom i tostanim kruhom.
Glavna jela: Tu se v ovo doba leta fakat more najti kaj vam srcu drago. Čušpajzi na sve mile načine, lešade z malo mesa ili z kakvom ribicom. Ono kaj je jako praktično kaj se neki čušpajzi moru jesti i zdeni. Recimo Đuro obožava jesti zdenoga čušpajza od mahuni i tikve a i meni pašu.
Ak baš morate pohati, peči ili roštiljati (krmenadli, piletina, vratina, i slično), ostanjke drugi dan svakak iskoristite za jednu dobru, ukusnu zdenu šalatu. Kraj tolko friškoga povrča sve su kombinacije moguče. Ak još k tome dodate kuhana jajca rešili ste problem za dobar obrok pa i dva.
A testenine? Imate velki izbor a i kojekakve kombinacije za brzi obed.
Sendviči: Morti si mislite da se šalim?.NI govora. Ja od navek volim dobar ali jednostavan sendvič. Recimo friški kruh dve vrste salame (šunkerica i mortadela) i šnita ementalera. Nikakve šalate ili druge zelenjave mi z tim ne pašu ali mi zato paše dobro ohlađena krigla pive. Verujte da to more v ovim žarkim vremenima itekak zameniti bilokakav obed. Ako pak napravite z toga topli sendvič morti bu pasala i druga pivica.
Desert: To bar danas ni problem. O piču sam več nekaj rekel al vam morem pomoči z jednim praktičnim rešenjem. Trenutno ima jako puno onih ranih kruški lipanjskih lepotici koje morate brzo pojesti jer se brzo kvariju. Kak smo dobili od pajdaša Tonča vrpu tih kruški, jedemo ih v svakoj priliki, napravim kompota i denem ga vu frižider. Osveženje za deset.
Bum vam se malo i požalil. Obzirom da me zadnjih par dana napal giht ovakav jelovnik mi je više nego dobro došel. Bum spojil ugodno i zdravo.
.
