Negda je lipanj bil v Draganovcu jako prometan. Imali smo i po dva tri vikenda za redom nekakav rođendan, imendan ili nekaj slično. Zadnje vreme su se stvari malo promenile al smo zato malo obogatili početak srpnja. Nisu baš nekakva dobra vremena obzirom na ovu prestrašnu žegu al smo se nekak snašli, malo je osvežilo al smo ipak odlučili da se lakše diše v kleti nego pod brajdom. Ak se tokom tjedna klet ne lufta i spustiju se šarapolke, v kleti je čak i podnošljivo. Posebno ak ima dost dobro ohlađenoga piča. Več odavno imamo za slučaj takvoga vremena uhodane pripreme: doma se napuni par flaši z vodom, zmrzne se i onda se sve to hiti v jedan vaštruk z vodom i imate tamanohlađenoga piča za celi dan. Negda su v takvim prilikama ljudi skopali malo veču rupu, napravili podlogu od slame i na to poslagali štange leda. Prirodno čuvanje namirnica bez potrošnje energije.
Daklem ovak! Krajem lipnja su rođendane imali Tinča i Atač, a kak su v to vreme poiskali osveženje negde kraj mora, pajdašiju su odlučili pozvati na malo druženje i blagovanje prošloga vikenda. Za okupljanje stare pajdašije nigda ni kasno.
Jedini je problem ovo srpanjko vreme ali se i tome more doskočiti. Osmislite jelovnik, kupite potrebne namirnice i skoknete v Herešina do proverenoga majstora koj bu to sve lepo spekel. Kuriti roštilja fakat nema smisla i štel bi videti junaka koj bu stajal dve-tri vure da speče mesa za dvadesetak ljudi. Naravno da gazdarica pripremi kojekaj doma tak da se na licu mesta kaj manje prtlja oko peči. Neke stvari se moreju za nuždu zgotoviti i na rešou.
I kaj da vam velim? Bilo je svega kak i navek i moglo se je v miru na tenane blagovati i spominjati o koječemu. Morti vam se dopadne ovaj prigodni jelovnik za neku prvu zgodu dok bute tak nekaj trebali organizirati:
Aperitiv:
Istini za volju malo je bilo kandidata za nekaj konkretno. Tu i tam nekakva rakijica.
Predjelo:
Bogati ovali z nareskima svih fela, namazi od sira, odgovarjuči prilogi, friško pecivo, pogačice od sira. Morti sam nekaj i zaboravil.
Glavno jelo:
Odlično pečena i fino začinjena krmetina z puno kojekakvoga povrča. Šalata po izboru.
Desert:
Morem vam reči da su si naše dekle dale truda, bilo je kojekakvih drobnih kolači pa čat i tiramisu. Piče po izboru. Kak sam več i spomenul sve je bilo dobro ohlađeno da si morete saki čas ugasiti žeđ.
Morti bute mislili da to ni baš preveč lagani letnji obrok i bute imali praf. No dok se sve to rasporedi na nekolko sljedova i zalije z zdenim gemištom sve dojde na svoje.
Moram vam pri desert otkriti jednu tajnu. Nisam baš lud za kavom al nekak je več letima običaj da ja kuham kavu. Ak ništ drugo vele da kuham dost jaku i navek iste kvalitete. Možda bi se mogel negde zaposliti kak kafemajstor.
Nekaj vam moram reči za naše bolše polovice. Od navek su bile odlično organizirane. Ovaj put je dirigentica parade i glavna domačica bila Seka Silva kaj joj je nekak ostalo v naviki još od vremena aktivnoga staža. Uostalom več odavno je poznata stvar da naše dekle imju smisla za organizaciju i realizaciju naših okupljanja. Pedesetak let iskustva nije mala stvar. I još nekaj. Dok smo navečer odlazili z kleti tak je sve bilo sređeno kak da se v kleti taj dan ni ništ događalo.
Stanje v goricama
Moram vam priznati da me jako brine kaj se bu ove jeseni dogodilo z berbom. Opče je poznata stvar da je jako zabrinjavajuče stanje z vočem, a tak mi se nekaj čini da bu i z grožđem. Jabuki, kruški i breskvi bu na parove razbroj, a grožđe teško podnosi ove silne promene koje su se dogodile v zadnjih mesec dana. Em su navalile nekoje boleštine, em je prošli tjedan svoj dio zela i tuča. I kaj nam preostaje nek delati zaštitu, gledeti prema gore i pratiti prognozu. No ni to ni največe zlo na svetu. Za ovih šezdesetak let kak sam došel v Mirni dol bilo je fakat svačega. Bumo mi i to preživeli. V nekakvoj baš zabrinjavajučoj situaciji bumo skočili do Baranje ili Slavonije i kupili kakvih sto-dvesto litri mošta. Neki naši prijateli to prakticiraju več letima.
Početkom kolovoza pak bi se trebal pri meni v kleti odigrati jedan važan društveni događaj, al o tome vas bum izvestil tam negde posle godišnjih odmora.
Ovaj tjedan moram fakat razmisliti o jednom primerenom jelovniku jer kak morete čuti svakud po medijima, i meteorolozi i nutricionisti stalno upozoravaju na odgovarajuču zaštitu i prehranu. Bum vam predložil ovak nekaj.
Moj tjedni jelovnik
Petek
Juha: Danas je nema
Glavno jelo: Kupite paniranu ribu ili piletinu i dodajte malo kuhanoga krumpira na putru
Desert: Jedan pol-pol bu ipak pasal
Subota
Juha/Glavno jelo: Jajca na oko ili kajgana z puno šalate; ja bum napravil šalatu od vugorki, paradajza, paprike i malo luka
Desert: Zdeni kompot
Jedna moja varijanta navek igra: kuhana zdena kranjska, skrajec kruha i zdeni paradajz blago posoljen. Nemrete pogrešiti.
Nedela
Juha: Lagana pileča juha
Glavno jelo: Kuhana piletina, povrče z juhe z maslinovim uljem
Desert: Dobro ohlađena lubenica/dinja
Pondelek
Juha/Glavno jelo: Sir z vrhnjem; ako baš morate dodajte malo tanko rezanoga jegera ili špeka
Desert: Znam da bi tu pasal gemišt al malo razmislite!
Tork
Juha: Dobra bu jedna lagana z vrečice
Glavno jelo: Krmenadli/šnicli na naglo, zdela šalate
Desert: Malo zdeno pivo
Sreda
Juha/Glavno jelo: Čušpajz od tikve z hrenovkama;
Desert: Sok i pak sok
Četrtek
Juha/Glavno jelo: Složenac od povrča; ak niste zadovoljni samo z povrčem dodajte kakav falačec junečega mesa
Desert: Sladoled
