Dan žena je iza nas ali nekak imam potrebu nekaj danas reči o tome. O povijesti toga dana se fakat puno zna ali mi se nekak čini da to više ni “kak je negda bilo”. Morti je to zato kaj nisam više v radnom odnosu pa ne vidim kaj se događa na taj da vu velikim firmama ili je značaj toga datuma malo splasnul i dal mesta recimo Valentinovu. No z tim se nebum preveč opterečival. Kak bilo da bilo mislim da ženama treba pokloniti jako puno pažnje svaki dan a ne samo prigodice. Bum vam rekel na kojem su mestu žene pri meni.
Z letima sam skupil fanj kazeta i CD-a z kojekakvom glazbom jer mi to čini baš pravo zadovoljstvo. Moja privatna diskoteka navek mi dobro dojde v trenutkima dok mi se ne dopada glazba na radiju. Dok sedim za PC-om posebno mi paše instrumentalna glazba no v onak baš za dušu si denem neki CD z poznatim svetskim ili domačim pjavačicama. Samo da vam nabrojim neke legendarne:Ella Fitzerald, Natali Cole, Diana Krall, Catarina Valente i druge z tih stareših generacija. A domače? Ni tu ne odstupam od starije garde koje mi i danas izazovu emociju i još su navek na top 10 moje rangliste. Tu su dive kak je Gabi Novak, Radojka Šverko ili pak neponovljiva Amira Medunjanin.
Al da se malo osvrnem na ono kaj je nekak v tonu moje kolumne. Kaj je sa ženama v kuhinji? Tu mislim da je ženama napravljena mala nepravda. Od kak je sveta i veka priču o kuhanju počinjemo z onim “kak su kuhale maše bake/mame”. Sigurno niste nigda, ili jako retko, čuli “kak su kuhali naši dedovi/tate.” Čuli ste ono “kak su jeli naši stari” kaj govori samo o gurmanluku a ne i o kuhanju. Z duge pak strane probajte malo razmisliti ko su to poznati “chefovi”? V devedeset posto slučajeva to su muškardini i v stvarnosti i po medijima. No navek se pitam ko je te “chefove” vučil kuhati? Pred nekaj vremena sam čul jednu izjavu Tomice Špičeka da se on doma niti ne prima kuhače nego to prepušta svojoj ženi. Zna čovek ko je doma bolši kuhar. O tome ko je kuhal negda v mojoj familiji od navek se znalo. Moj stari nije dogural niti do kuhanja čaja a mleko bi mu sigurno skipelo. Kakva je stvar več letima v mojoj familiji to več znate odavno: stroga je podjela. Ja kuham slana jela a Đuro priprema slatko. Tu vlada prava ravnopravnost.
Novosti va našem gradu
Ovih sam dana prečital veliku novost v gastro ponudi našega grada: Koprivnica je dobila i vino od koprive. Bravo mi. Več pred dost let smo napravili od koprive pivu, gin, rakiju, čololadu i praline a sad imamo i dopunu v ponudi piča. Ko voli nek izvoli. Konačno mi smo Koprivnica i red je da nudimo baš tak nekaj. Moram priznati da sam jako znatiželjan i jedva čekam dok bum imal priliku probati to vino. Vele stručnjaki da se to vino lepo slaže z hladnim predjelima, šalatama, šparogama i sličnim delicijama. Nadam se da bumo uskoro mogli to probati i v našim koprivničkim restoranima. Da se delaju kojekakve fine papice od koprivi to ni nikakva tajna. Dok najdem mlade koprive v goricama znam i ja napraviti juhu ili sos od koprivi. Fakat su jako ukusne a za koj dan im bu baš došlo vreme. Samo da malo zatopli.
I prije nego sam prečital o novost od vinu od koprivi našel sam na svojoj “gastropolici” dve knjge na koje sam več odavno zaboravil: “Neuništiva blagodat koprive” i “Tajne koprivine kuhinje”. O tome vam bum nekaj napisal drugom prilikom.
Vinari v akciji
Nema tome više od tjedan dana kad vidim da su naši vredni vinogradari z Udruge “Fran Galović” Starigrad imali svoju skupštinu. To mi je drago čuti i videti. Lepo vidim da se okupil popriličan broj naših vinogradara, vidim da ih je došel pozdraviti i naš gradonačelnik Mišel al me je nekaj zbunilo. Prečitam da je izvještaj i program rada podnesel Velimir Briški Brile a njemu ni traga ni v radnom predsedništvu ali ni v publiki. To ni prava i valjana skupština ak nema predsednika ni njegove slike. Srečom kaj imam pri ruki jednu frišku sliku z njim v ambijentu mojih gorici. Brile je baš naišel v moju klet dok sam z jednom mlađom ekipom delal mesariju. Nadam se da se nebu srdil kaj sam ga del v novine.
Brile v poseti trudnim mesarima
Da iskoristim priliku bum spomenul i reč dve o vinskim cestama v našem kraju. Znam da se o tome več dugo pripoveda al je do sad sve to ipak samo na lepim pričama i nekak još daleko od pravoga rezultata. Ak mene pitate to bi svakak trebalo napraviti jer uvjeta i razloga za tak nekaj sigurno imamo. Z dobrom kapljicom svakak bi jako do izražaja došla i naša tradicionalna podravska kuhinja koja je sigurno ravna bilokojoj regionalnoj kuhinji v Lepoj Našoj. I dok povežete sva ta naša sve kvalitetneša vina i naše delicije z koprivama, imali bumo ponudu kakvu samo poželeti morete.
Moj tjedni jelovnik
Petek
Juha/Glavno jelo: Konačno ričet; najte štedeti na kožicama a malo suhoga mesa nebu škodilo
Desert: Morti čaša crne pive?
Subota
Juha: Bela juha
Glavno jelo: Kraljevski rezanci
Desert: Sok
Nedela
Juha: Goveđa juha z leberknedlima i sitnim rezancima
Glavno jelo: Juneče rolice v saftu od povrča, luleki od kolko-tolko testa
Desert: Lisnato z makom/orehima
Pondelek
Juha/Glavno jelo: Povrtno-pileči ragu
Desert: Najdite nekakvu napolitanku i poterajte z vodom
Tork
Juha/ Glavno jelo: Sekeli gulaš; ovo je posebna naruđba za jednog pajdaša
Desert: Štrukli z jabukama
Sreda
Imam dilemu
Glavno jelo: Sarma ze škrinje ili špek fileki?
Desert: Tu paše i gemišti i pivica
Četrtek
Juha: Kobasičja juha
Glavno jelo: Pečene friške kobasice, dinstano zelje
Desert: Gemišt
