Verojatno nisam jedini kaj se veseli ovome mesecu i od navek je to bilo vreme malo drukčešega raspoloženja nego ostalo meseci. Doduše v ovim poremečenim klimatskim uvjetima ugođaj svibnja se more malo i poremetiti al sve vu svemu svibanj je još navek mesec pravoga ugođaja i nekakvoga očekivanja bolšeg nastavka leta. V svetu je taj mesec poznat po nazivu maj koj je izveden od latinskoga korena maius. Meni je nekak draži naš naziv svibanj, a ak malo bolje razmislite i nazivi ostalih naših meseci v letu su baš drukčeši i lepo zvučiju. Slične nazive meseci morete najti još samo v nekim slavenskim jezikima. Recimo v slovačkom. Vele da je naziv svibanj došel od biljke svib koja ima prelepi beli cvet kaj je baš v skladu z tim mesecom. Našel sam da su se rabili i neki drugi nazivi za taj mesec kak su filipovčak, po sv. Filipu trečega svibnja, pa onda rožnjak ili pak sviben. V rimskome kalendaru je to bil treči mesec, dok se budi priroda i sve cveta. Morti su Rimljani živeli v nekakvim drukčešim klimatskim uvjetima jer v našem podneblju je treči ipak još navek zimski mesec.
Važni datumi v svibnju
O našem tradicionalnom prazniku rada sam nekaj napisal prošli tjedan makar smo mi bili praktični pa smo taj dan smestili na kraj travnja z dva razloga: bila je subota a te je subote moja Đuro imala i rođendana. Naravno da vam nebum otkril koj je to rođenda bil, ženama, pogotovo ne vlastitim, se leta ne brojiju i ne spominju.
Prvoga svibnja je rođena i moja draga pajdašica i šulkolegica Boka. Ona več desetlečima živi v Sremskim Karlovcima ali je v srcu ostala navek prava Podravčica, koja je do ove nesretne korone redovito dolazila na naše godišnjice mature. Nismo bili isti razred, al smo se baš čez te naše godišnjice zbližili i ne zaboravljamo si čestitati blagdane i rođendane. Nadam se da bu došla i na našu veliku obletnicu mature v lipnju.
Drugoga pak svibnja rođendan ima naše kumče Eja. Ak se dobro sečam došel sam negda na njezin drugi rođendan dok su na rođendan deci dolazili i starci. Čim deca malo porastu starci na rođendanu moreju samo smetati. To ne znači da nesmeju čestitati i donesti kakvoga cveteka. Tak je bilo i prošli tjedan.
Pred neki dan je rođendana imal i pajdaš Žač al vam nebum otkril koj mu je to po redu. Ni ozbiljnoj gospodi ni pristojno spominjati leta. Drugi pak tjedan bu rođendan naše pajdašice i kume Sonje. Ona doduše več par let živi v Primorju ze svojom familijom al ni nju nesmemo zaboraviti. Bu se tokom leta navrnula v našu lepu Podravinu pa joj bumo čestitali vu živo i popili koju kupicu za njezino zdravlje.
Ima i drugih važnih datuma vu svibnju. Za vinogradare je važno jako pažljivo pratiti kak raste loza, opleviti ju od viška zelenjave a da vam ne govorim kak saki čas treba kositi. Posla ima i v podrumu. Negda je bilo pravilo da se vino mora pretakati v mesecima na S a kak je sad baš svibanj ovih dana buju moj podrumari Robi i Jan morali odvojiti nekaj vremena da se prekontrolira kvaliteta vina i ako treba časkom to pretočiti. Usput nekaj prizalogajiti i zaliti s kupicom vina. Danas ti mladi znaju puno više nego mi malo postareši vinogradari.
No kad več spominjem taj lepi mesec i prelepu prirodu moram reči da je baš nekak z početkom meseca počela i sezona roštiljanja. Investiral sam v novi poveči roštilj pa ga treba i rabiti. Dvaput smo to napravili mi veterani a treči put je to napravil mladi naraštaj. Jan je ugostil svoju sestričnu i bratiča Zagreba kojima takaj lepo dojti v Draganovec. Šteta bi fakat bilo vikende potratiti negde v zaprtome prostoru dok priroda mami. Mislim da je svaki zalogaj v prirodi, na friškome zraku vredneši o surfanja po internetu ili gledanja sapunici, prastarih vesterna ili ofucanih krimiča.
Svakodnevno – Eurovizija
Nadam se da mi nebute zamerili kak starome muzikantu kaj se bum upustil v kratki osvrt na tu današnju modernu muziku. Znam da bute morti rekli kak sam ‘stara konzerva’ i da ne razmem kaj se v današnje vreme svira i sluša… Gledal sam vam ja z jednim okom i Doru dok je pri nama bil izbor za Euroviziju, al, najte mi zameriti, meni vam se to nekak ne dopada. Videl sam ja puno mladih pjevačica i pjevača, bila je to parada plesa i kojekave obleke, al za mene od muzike malo pa ništ. Nekaj bi štel pitati i organizatore takvih priredbi: Kaj naš hrvatski jezik ni dovoljno dobar za takvu muziku? Kaj baš sve v ovom našoj svakidašnjici mora biti na engleskome? Sve si onak mislim da bi retko koju od tih popevki pak poželel čuti. Al si isto tak mislim da to kaj ja mislim i ni važno mladim ljudima. Ja sam nekak ostal v onoj navek zelenoj muziki i v onoj popevki koja mi zvleče emociju pa i suzu. Zato vam ja imam navek pri ruki onih par-sto CD-a na kojima je baš moja muzika: od Net Kinga Cola, prek Elle, Olivera, Bogdana i Dukata do Strausa i Vivaldija. To je muzika koja vam mazi vuho i nigda vam ne dosadi. Znate da sam nedavno i pisal o muziki koja je baš prigodna za blagovanje. Morete zamisliti da v Draganovcu z mirisnim zalogajima roštilja pustite Mamu ŠČ? Ite prosim vas!
Moj tjedni jelovnik
Petek
Juha/Glavno jelo: Čušpajz grah ze suhim mesom
Desert: Žemljača
Subota
Pital je Jan neki dan: Kak se peče riba roštilju? Bumo to danas rešili:
Predjelo: Riblja pašteta na tostu
Glavno jelo: Riblji roštilj: par malo večih skuša i brancina, povrče na roštilju; sve to prelejati z češnjakom i peršunom v maslinovom ulju
Desert: Treba uopče razmišljati: vino ili gemišt. Mala sugestija: ze skušom ide crno vino, a z brancinom belo.
Nedela
Juha: Juha od povrča
Glavno jelo: Zagrebački od svinjetine, kroketi od krumpira, šalata
Desert: Pita z jagodama, kapučino
Pondelek
Juha/Glavno jelo: Špagete karbonara z puno parmezana, šalata ak vam paše
Desert: Znate več: pita od jučer
Tork
Juha/Glavno jelo: Pileči rižoto, šalata od rotkvice
Desert: Kuruzna zlevanjka
Sreda
Juha: Jedna Podravkina z vrečice
Glavno jelo: Kajgana na špeku, zdela šalate
Desert: Nekakav smuti
Četrtek
Juha: Krem juha od semenki z krutonima
Glavno jelo: Krmenadli na naglo, pomfrit, ajvar
Desert: Kakva napolitanka a dobar bu i sok
