Sad se sigurno pitate zakaj pisati o bavarskoj kuhinji sred leta i to sred Podravine? Razlog je jednostavan. Ovih sam dana čul kojekakve komentare kak je na Jadranu manje gostiju na nekim lokacijama, kak je jako skupo, kuglica sladoleda 3,5 eura, i da buju sezonu spasili gosti z Bavarske jer tam počinju letno ferje. Kaj če reči da moremo ovih dana očekivati navalu na Jadran baš z te največe njemačke savezne države. Bavarcima je lakše dojti z Munchena do Istre nego recimo ak putujete z Iloka v Makarsku. Ima još jedan razlog. Nekak se dogodilo da baš v Bavarskoj budem nekolko put v različitim gradovima i da nekak najviše upoznam njihovu kuhinju. Pa kaj je onda to tam tak interesantno i posebno?
Moja iskustva v Bavarskoj
Munchen je nekak grad kaj nam prvi padne na pamet dok spominjemo Bavarsku.To vam je nama z Lepe Naše kak da idemo v Zagreb samo kaj je malo dalše. Tam se čovek more jako brzo snajti ak baš očeš čuti našu domaču reč ili da pojedeš nekaj skoro kak doma. Tak smo se jemput jedan moj kolega i ja našli v jednom finome restoranu, a domačin nam je bil jedan velki poduzetnik z Međimurja. Mučimo se mi z jelovnikom z nekim čudnim nazivima jela na njemačkom, zbiramo kaj bi nam pasalo za večeru, kad najemput naša konobarica lepo progovori na lepoj našoj kajkavštini i predloži nam ono kaj je taj dan bilo najbolše na jelovniku. Da bu stvar interesantneša, još jedan njezin kolega i šef sale su bili ze Sračinca. Samo se pitam zakaj nas je tak dugo pustila da se mučimo z jelovnikom?
Onda je jemput jedna ekipa z Podravke bila v poluprivatnoj poseti jednom važnom poslovnom partneru, lepo se proveli na njegvom privatnom jezeru al smo drugi dan pak završili v Munchenu. Razgledali smo grad i odlučili se za nekaj kasneši gablec, a onda prejti na dobru večeru. To ni bila baš dobra odluka. Za gablec smo pojeli poznate bavarske bele kobase z nekakvim prilogima kaj vam je zapraf jedan jako lagani obrok. Naravno da smo začas bili gladni al si nemreš pomoči kad je prema protokolu večera tek v sedmi vuri. Onda nam se dogodi ovo. Posle nekakvoga predjela svaki od nas je dobil celoga pečenoga bunceka z pečenim krumpirom i kiselim dinstanim zeljem. Kak smo mi več popodne pregladneli toga smo bunceka mogli samo gledeti. Kaj je preveč je preveč. Ak niste oprezni to bi vam se moglo dogoditi i na Oktoberfestu. Opče je poznata stvar da su glavne zvezde na Oktoberfestu, osim pive naravno, pečeni bunceki i piceki. Ak ste pri apetitu onoga celoga kalibriranoga piceka još i morete pojesti al z buncekom je več malo teže. Pametno je to podeliti z pajdašom. Ima tu još jedna zamka. Na toj najvekšoj pivijadi na svetu se uglavnom pije piva, iako ni količine vina nisu zanemarive. I tak se među celom ekipom najde i nas nekolko koji smo gemištaši ali domačin nas ni poštedil. Gemišta nismo ni vidli a posle dobro pečenoga bunceka preveč ti je mala krigla pive od litre. I to nekolko put. Očito je trebalo malo i trenirati.
Jemput sam bil čak celi mesec v gradiču Prien na Ciemseu. Malo sam učil njemački jezik. Gradič je trečina naše Koprivnice al je jako turističko mesto z puno kojekakvih restorani. Kak student sam dobil i nekakav popust v nekim restoranima al da prostite to je bilo baš onak jako skromno kak v pravoj studentskoj menzi. Onda sam se odlučil za neke talijanske restorane kaj je takaj bil čisti promašaj. Rešenje sam našel v jednoj delikatesnoj trgovini, gde je bil čisto pristojan dnevni jelovnik, i v pečenim picekima. Skoro je svaki dan pred studentskim domom došla ona pokretna pečenjara z picekima. Celi picek z malo šalate i pecivom za dva obroka. Čist pristojno za studenta.
Dok sam malo bolje upoznal prave bavarske delikatese nekak mi se činilo da ima jako puno sličnosti z našim domačim papicama i čovek skoro nebi niti osetil nekakvu velku promenu kad bi moral tam dulje živeti. Poglečte malo ovo kaj sam našel kak bavarski specijalitet: prežgana juha, široki rezanci ze šunkom, namaz od čvarki, krumpirovi knedli, krumpirova šalata, fileki, kiselo zelje z buncekom, filana guska, filana teleča prsa, pohani mozak, brizli veprovina i druga divljač na razne načine i… Ono kaj se meni pak jemput jako zdopalo v nekoj provincijskoj birtiji bil je goveđi rep v pikantnom saftu z knedlima od kruha.
Znate kaj mene jako zanima? Kaj Bavarci jedu na našem Jadranu? Ponuda je fakat jako bogata, imate svega al naši ugostitelji navodno dižu cene v nebo. Morem si samo misliti kolko košta fina jadranska riba ili pak kila janjetine? Turisti z Evrope sad imaju jednu olakotnu okolnost: nema menjanja eura za kunu i mam moreju usporediti kaj kolko košta pri njima doma i pri nama v Lepoj Našoj.
Imam jedan predlog za sve turiste koji nisu ludi za morem: dojdite v Podravinu ili Slavoniju. Verujte da bute bogovski blagovali i to po čisto pristojnim cenama. Osečali se bute kak doma a sve bute mogli zalejati ze sve kvalitetnešim kontinentalnim vinima.
Znate kaj mislim? Ovo čudno letnje vreme fakat zahteva laganu kuhinju. Bum se tome posveti sledečih tjedna dana.
Moj tjedni jelovnik
Petek
Juha: Krem juha od karfijola
Glavno jelo: Pečene srdelice, krumpir šalata z majonezom
Desert: Čaša vina
Subota
Predjelo: Sirni namaz na kuruznom kruhu
Glavno jelo: “Pileči roštilj”: krilca, šareni ražnjiči od beloga mesa, iskoštene bocke i lopari, paprika, paradajz, mladi luk i kaj vam več paše.
Desert: Dobro ohlađena dinja z par kapi ruma; ako baš morate nekaj popiti nek bu lagani gemišt
Nedela
Juha: Juha od telečih kostiju z kašicom
Glavno jelo: Teleča koljenica v povrču, mladi krumpir na putru
Desert: Pita od jagodi
Pondelek
Juha:Povrtna juha
Glavno jelo: Kajgana z gljivama, šalata
Desert: Znate več: pita od jučer
Tork
Juha/Glavno jelo: Čušpajz od krastavci, pire
Desert: Palačinke z linoladom
Sreda
Juha: Tarator iliti zdena juha od jogurta/kiseloga mleka
Glavno jelo: Špagete ala francuski krumpir; mesto kobasi morete koristiti podinstanu piletinu
Desert: Sladoled
Četrtek
Juha/Glavno jelo: Musaka od kelja
Desert: Lubenica
