Tih let se točno znalo kak se osvežiti za žarkih srpanjskih dneva. V potoku Koprivnica bilo je vode i više nego treba. Delali su i prvi i drugi slap a nije bilo loše ni pri mostu pri Jakupančevoj pilani. Ak ste imali bicikla zaputili ste se na Šodericu po glavnoj cesti ili pak po onoj malo problematičnoj stazi kraj pruge. V to vreme vam ništ ni bilo teško. No ja bi štel napisati nekaj o jednom događaju tokom srpnja mam nakon kaj je moja generacija gimnazijalci maturirala. Mala avantura.
Kak nisam nigda bil na pravoj radnoj akciji, negde tam širom bivše države, priključil sam se lokalnoj radnoj akciji na Šoderici sastavljenoj od gimnazijalci i naših kolegica i kolega ekonomaca. Bezbrižna ekipa puna mladosti koju pravi problemi očekuju tek v jesen dok počinju prijemni ispiti na faksu.
Tih je leta Šoderica bila pravo Podravsko more, mesto koje se nemre ni nesme zaobilaziti tam negde od lipnja do sredine rujna. Mi smo to iskoristili na pravi način: stanuješ zabadaf pod šatorima, dobro te hraniju a kakti zauzvrat ti malo nekaj delaš tokom prijepodneva. Zapraf je to bilo opuštanje v društvu kolegica i kolega na našoj podravskoj rivijeri. Z mojega razreda su bilo četvorica muških al nam se nažalost nije pridružila nijedna kolegica. Situaciju su spasile mlađe brigadirke i kolegice ekonomke pa je ipak bila čista ravnopravnost spolova.
Miha je bil prvi čovek brigade, Lojzek glavni ekonom, Đuro i ja akcijaši. Bili smo i cimeri v jednom šatoru gde nam se pridružil i naš bolničar Joža. Kamp je bil smešten tam na prostoru ispred “Bele lađe” ispod drveča i samo desetak metri do “mora”. Ak se za vreme posla oznojiš časkom si vu vodi i poiščeš malo osveženja.
Kaj smo zapraf delali? Naš glavni posel je trebal biti očisiti plažu, pokrčiti seču i sve to potrpati na prikolicu. Znalo se dogoditi da mi skrčimo celo prijepodne koj meter seče a onda dojde bager i sve to časkom zravna. Trasirali smo i cestu prema Đelekovcu. Glavni nam je majstor bil jedan cestar koj je malo krivo prečital nacrta. Popodne dojde prava inženjerka i veli: “Krivo ste delali. Trasa ide deset metri severnije”. Pak sve spočetka. Baš je bilo zabavno.
Kak smo se hranili?
E to ste trebali videti. Nemrete imati na takvoj akciji bolše rešenje nego dok dobite kuharicu, domaču ženu z Drnja. Ženica je delala v školskioj kuhinji a prek leta je došla nekaj zaraditi na dva meseca kuhajuči za brigadiste. To se zvala kuhinja. Za dio kvalitete je bil zadužen i naš ekonom Lojzek jer je nabavljal namirnice po Botovu i Drnju. Navek je bilo dost pernatoga mesa, friških jajci, povrča a bome i sira i vrhnja. Bilo je jako važno kaj nismo jeli na porcije nego zemi kolko očeš i moreš. Pamtim jednu zgodnu situaciju dok je obed bil pripremljen za celu brigadu a nas je bilo taj dan samo polovica. Najme kaj. Jedne je nedele skoro pol brigade otišlo v Koprivnicu na mototrke. Kak to kuharici nisu na vreme javili, ona je sve pripremila kak i obično. Za glavno jelo su bili pohani svinjski šnicli i pire krumpir. Trebali ste videti taj masakr. Imali smo dvojicu koji su navek bili pri apetitu. Jedan visoki i suhi kak bakalar a drugi malo nižeši i okrugli. V jednom su momentu vidli da više stane šnicli ak ne jedu pire i šalatu i hapili su se jesti samo šnicle kak krekere. Da bi malo više stalo, malo su se digli od stola, malo skakutali da se šnicli fino posložiju i onda nastavili. Svaka čast.
A kak smo se zabavljali? Mladost navek najde načina kak ispuniti slobodno vreme. Kupanja kolko očeš, zafrkancije nigda dosta a tekučeg osveženja mam tu kraj nas. Prvi sused nam je bil “restoran”, onaj drveni objekt kojega se dobro sečaju svi stareši kupači. Tam na kraju plaže prije motela bil je Podravkin objekt kojega su koristili ribiči ali i svi gosti namernici. Kak je šef objekta bil tata od jedne naše kolegice, ni bilo teško prošetati i nekaj pojesti za međuobrok ili popiti čašu “En starčeka”. Kad sam več spomenul motela, baš je to leto Bilokalnik počel gradnju motela od montažnih elementi. Jedan je dan dio brigade išel pomoči pri istovaru tih elementi. Ne sečam se gda je motel bil završen al se sečam da je deset let kasneše, 1973. leta, naš bend “Panonia” na toj terasi odsviral dio letnje gaže. Bil je to ples na otvorenom v kupačim kostimima a trajal je od treče popodne do desete vure navečer dok nije otišel zadnji vlak ili autobus.
Moram spomenuti i jedna neobičan i retki događaj za jednu brigadu. Teško se more jedna koprivnička brigada pofaliti da ju je posetil važni političar. Nama je pripala čast da nas jednoga lepoga dana poseti v ono vreme jako popularni Mika Špiljak. O njemu je svojedobno ispričano više viceva nego o Bobiju i Rudiju.
I kaj da vam velim? Brzo je prešlo tih šezdeset let, vremena su se promenila, Šoderica se promenila al mi se nekak čini da je v ono vreme bilo više života na tom našem moru nego današnjih dana. Nekakva je utjeha da kazališne i još neke predstave obogačuju leto na Šoderici al se teško more dogoditi da prek vikenda dojde po nekolko hiljada ljudi. Kaj su Podravcima i Prigorcima fakat interesantneši Jadran ili pak Čingilingi?
Moj tjedni jelovnik:
Petek
Juha: Riblja juha od osliča z rižom
Glavno jelo: Kuhani oslič, kuhani krumpir na maslinovom ulju
Desert: Retki gemišt
Subota
Juha: Bela juha
Glavno jelo: Krpice zeljem; morete dodati par kranjskih ili podistati malo junetine
Desert: Vočna šalata
Nedela
Juha: Povrtna juha
Glavno jelo: Janjetina z mladim krumpirom, mešana šalata
Desert: Dinja z malo ruma ili maraskina
Pondelek
Juha/Glavno jelo: Blitva ala špinat, jajca na oko
Desert: Voče
Tork
Juha:Paradajzova juha z noklecima
Glavno jelo: Faširanci/popečki/polpete od krumpira; ja sam ih se nekaj najel v detinjstvu. Morti z tim paše kakav tartarsos?
Desert: Sok, limunada il nekaj slično
Sreda
Juha/Glavno jelo: Pileči paprikaš ze širokim rezancima
Desert: Smuti od svačega pomalo
Četrtek
Juha/Glavno jelo: Musaka od patliđana
Desert: Mazanica sirom
